Matthew 14

Heroda nuana i ipeipesi: Ioane Bapatiso se unui wa

Mk. 6.14-29; Lk. 9.7-9

1Nei huiana ne Heroda tetarake, Iesu wasana lailai i ataiei. 2Ia ena heaheariyao i heribadi, i ene, “Ina ta Ioane Bapatiso ede; ia mate eai i torouio, arinai ede laulau gigiboridi ta i hemasarahadi.” 3Nabada wa Heroda Ioane i toaiyao, eo i auyao, abo i tutugudui numa masigiri eai, ana mata paana ede Herodia, ena tau Pilipo monena. 4Ioane ia i heriba i ene, “Ia ue abi arinai laugagaeo u utusi.” 5Ia Ioane bena i unui, na tatao gamagaridi i matausiedi, paana ede isi si ene ia peroveta. 6Heroda edi huia labasina huiana eai, Herodia natuna siu ana taumana matadi eai ie saga, Heroda i henualolo. 7Arinai abo Heroda i ribahesunumalaei ma aigorana, i ene, ena ginauri saha, saha i aibodaidi, abo i mosei. 8Sinana siu wa i ribahasahasaiyao, arinai i ene, “Ioane Bapatiso uruuruna se usai gaeba eai u leama.” 9Wasawasa abo nuana i baaea; paana mo i aigorayao, eo isi maenayao se aiaisega debadi eai, arinai i hetaladuidi. 10I hetamaridi, Ioane numa masigiri eai gadona se tom. 11Ia uruuruna gaeba alona eai se leama se mosei siu wa arinai: ia abo i laei sinana arinai. 12Ioane ena heaheatayao se laoma eaibarabarana se laei, se tore, abo se lau Iesu se heriba.

13Iesu wasana i ataiei, nei eai i gerugabaei, i lau malatupama eai: ena lau wa tatao se ataiei, eanua se laugabaedi, ia se lauwatai. 14Iesu i lagema, moutuana lailai i itadi, i nuatoatoaidi, isi enadi tauasiasiebo i hemauridi.

Tausani haligigi se heaidi

Mk. 6.30-44; Lk. 9.10-17; Io. 6.1-14

15I maimailahio abo ena heaheatayao se laoma ia arinai, si ene, “Malatupama ina, huiana i lauo: moutuadi ta u hetamaridi se laugorigori, se lau gougou headi aridi eai, aiai adi se uneune.” 16Iesu i heribadi, i ene, “Se lau se saha: aiai adi au mosedi.” 17Ia se heriba, si ene, “Ina ama falawa haligigi mo, eo eama labui.” 18I ene, “Au ledima arigu eai.” 19Moutuana wa i hetaladuidi se bawabigabiga lei potana eai. Falawa haligigi eo eama labui wa i abidi i itasae galewa eai i aihelahui, i ihidi, abo falawa wa i mosei ena heaheatayao aridi eai, isi abo se mosei tatao moutuana wa aridi eai. 20Isi gamagamagari se aiai, e bogadi se sese, mapuradi, se tanogogoidi bosa saudoudoi‐labui se monau. 21Isi tauaina nuana tatao tausani haligigi, sisine eo merumeru nige se hasiriesegaidi.

Iesu gabogabo potana eai i laulau: Petero ena sunuma gagirina

Mk. 6.45-56; Io. 6.15-21

22Arinai abo Iesu ena heaheatayao i lauhesomdi bena waga eai abo se geru, se baguna hari sana awasi eai: ia moutuana lailai wa abo i hetamarigorigoridi. 23I hetamarigorigoridio abo i dalasae oea esau arinai, i lausuara i lau‐uura; i maimailahi iabom nei eai. 24Waga wa gabogabo awaawasina eai wowori i hetahetaipiledi: mana i loaoa. 25Maiona boeana eai, mahana hasi, Iesu ie lau isi aridi eai, gabogabo potana eai ie lau. 26Ena heaheatayao ia se ita i laulau gabogabo potana eai, aruadi se loi, si ene earuyarua esau nei: se matausi, se eabayaba. 27Arinai Iesu i heribalaedi, i ene, “Nuamiu se taru: eau ede, tabu au matausi.”

28Petero ia arinana i heuio, i ene, “Guiau e, taba oa ede, u ribama abo ea laowa gabogabo potana eai.” 29I ene, “U laoma.” Petero waga abo i pesagabaei, i laulau gabogabo potana eai, i lau Iesu arinai. 30Ia mana lailai ie ita i matausi: abo i sariri, ie eaba, i ene, “Guiau e, u hemauriguma.” 31Arinai abo Iesu nimana i helelelaei, i abiisini, i ribalau ia arinai, i ene, “Oa nige u sunumaegu, ue saha nuam i ponoponousi?” 32Isi abo se lage waga eai, mana wa ie motu. 33Isi waga taugeruina ia se aihelahui, si ene, “Mamohoi, oa Eaubada Natuna ede.”

34Isi abo se duna hari sana awasi eai, se lage Genesereta oeana eai. 35Nei eanua ne tataodi ia se nuatui, abo se lau hetamari se lau gougou gamagari aridi eai, tatao asiasiebo gamagamagari se laedi ia arinai. 36Isi ia se nuaoini bena ana lulu dedeana se abiita mo: gamagaridi hinage se abiitalaei abo se mauri.